الأربعاء، 14 مايو 2008

ولاد وبنات فى لبس الخواجات !!

بسم الله والصلاة والسلام على رسول الله
والله يا اخوانا الامر محير والموضوع خطير انا محتار اترجمه بايه والله ؟!
اقول تقليد اعمى ولا عجز ولا ضعف ولا احساس بالنقص ولا.........ولا......ولا.........!!!!!!!!
الاول قلنا آبائنا وامهاتنا حفظهم الله هيخافو على اخواتنا الفضليات وما فيش ام او اب هيسمحم لبناتهم بالخروج فى زى التبرج تبرج ؟؟ تبرج ايه ياعم سيبك من الكلام الكبير ده وانزل من على المنبر........حاضر براحة خالص اهه
ما كانش الاهل بيسمحوا للبنت تخرج وهى مش لابسة لبس محترم يسترها ويحفظهامن اعين اللئام والشباب السيكو سيكو تمام ؟
جينا لقينا ماما بتقول البنت اتاخرت على الخطوبة والجواز ما بلاش خمار يا بنتى واللبس الواسع قوى ده والبسى حاجة كده من اللى هيا شفتشى دى خلى الناس تشوفك يمكن ربنا يرزقك بابن الحلال بدل وقف الحال ده
والله ؟! هى لما هتلبس حاجة تكشف جسمها وتمشى لابسة ولا كأنها لابسة هتتجوز "بلاش كاسيات عاريات اها "
ياختى تك داهية
هتتجوز ايه عيل مش محترم مش هيخاف عليها ولا يصونها هتتجوز واحد آخره شارع الهرم عاوز رقاصة مش عروسة
يعنى فيه واحد محترم يعرف ربنا من اللى الواحد يؤتمنهم على النفس والنفيس اول ما هيفكر يتجوز هيدور على مين بالعقل كدا يا خوانا المحترمة العفيفة ولا المتبرجة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انتى عاوزة تجوزيها لمين بالظبط الاخ الفلانى اللى كل الناس بتحكى عن ادبه واحترامه ومعروف خلقه ودينه وهيحفظها ويرعاها ويتقى الله فيها
ولا هتجوزيها للواد هيثم ابن الجيران الواد التوتو ده اللى بكرة لا هيعرف بيت ولا مسئولية وهتشيلى انتى وبنتك الهم طول عمركو ا وبكرة هيشوف غيرها اصل الجميلات كتروا لان الورنيش واللبس الضيق كتير بس المحترمات العفيفات شوية ووالله ثم والله بقوا بيتخحطفوا
بس نقول ايه ناقصات عقل ودين بقا !
طيب دى ماما انت فين بقا يا بابا؟!
والله يا بنى المدام شايفة كده وبعدين انا مش فاضى انا بقوم الصبح اخفى الشغل علشان اجبلهم الاكل واللبس والمكياج ما انت عارف ان الحاجات دى غالية ؟اه والله يا خويا عارف
طيب بس القرآن والحديث بيقولو....
استنى ؟نعم يا حاج ؟والله عارف بيقولو ايه بس البت تتخطب وليك عليا هتلبس خمارها وترجع تانى محترمة
الله كلام جميل قوى بس موت يا حمار
انت عاوز تقلعها ثوب العفة والطهارة وتقلها هاتى وراكى عيل ولا اتنين كل يوم وبعد كده هترجع محترمة تانى ؟انت اهبل ولا بتستهبل ؟
قلنا دا راجل كبر وخرف اكيد حمادة اخوها هيتصرف
نيجى نبص لحمادة نلاقيه عاوز حد يرفعله البنطلون يا دى الفضيحة دا لما بيقعد ايه ما اقلكش كله بيبان ههههههههههه عاوز تتجوز ولا ايه يا كتكوتة انت كمان البنطلون نفسه فى استك ولا حزام يمسكه بدل ما كل شوية واحد بيقله حوش اللى وقع منك ويبهدله فى الاض
انصح اختك يا بنى ؟ ولا استنى اختك ايه خلينا فيك الاول
ايه اللى انت عامله ده بنطلون واقع وتى شيرت محزق وسلسة زى بتاعة الكلب ولبانة زى السيكوهات
ايه يا بنى انت هتقلب ولا ايه؟؟؟؟ عاوز افهم
يقلك امشى يا عم انت حمار مش فاهم الموضة ؟
موضة ايه وزفت ايه الله يخرب بيت ابوك
الموضة انك تتخلى عن رجولتك وكرامتك مش مهم انت تتحرق المهم هنعمل ايه مع اختك؟
يقلك خليك سبو ر وسيبها على راحتها اللى عاوزة تعمله تعمله وانا مالى تمام اوى كده يا معلم وتسلملى رجولتك
وكده ضاعت البت من ايدينا
ولا حول ولا قوة الا بالله
قبل ما اخلص هقول رسالة لكل اخت متبرجة معلش الكلمة وقعها كبير بس معناها اكبر تبرج يعنى تفريط فى زيك وعفتك وطهارتك بقلك يا اختى انتى مش هتشيلى ذنب مخالفة امر الله ورسوله فقط لانك هتخالفى امر القرآن بعدم التبرج بل وكمان هتشيلى وزر اللى هيبصولك
نعم؟ اللى هيبلصولى ؟اه والله يااختى اى شاب هيبصلك ويعجب بيك وركز معاكى هو هيشيل ذنب وانتى كمان هتشيلى ذنب لانك لو التزمتى ما كانش هيبص واحسبى بقا كام واحد هيبصلك؟
لا وكمان ايه عارفة البنات اللى هتفتن بيكى وبلبسك ......... اه ما لهم ؟ هتشيلى ذنبهم لان لو واحدة شافتك وكانت ملتزمة ولاقت الناس بتبدى اعجابها بيكى وحبت تعيش الشعور ده وتبرجت او حدثت نفسها بكده انتى هتشيلى وزرها علشان زعزعتى ايمانها بنفسها وهى هتشيل وزر نفسها وناس هتبصلها يبقى تشيلى وزرها ووزرهم وهكذا دواليك
يعنى التبرج ده هم انتى مش قده يا اختى والله
شروط زيك بقا قبل ما تمشى
استيعاب جميع البدن إلا ما استثني. ( وهو الوجه والكفان)
أن لا يكون زينة في نفسه
أن يكون صفيقا لا يشف
أن يكون فضفاضا غير ضيق
أن لا يكون مبخرا مطيبا
أن لا يشبه لباس الرجل
أن لا يشبه لباس الكافرات
أن لا يكون لباس شهرة
ادلة وجوب الحجاب
قوله تعالى: وَقُل للمُؤمِنَاتِ يَغضُضنَ مِن أَبصَارِهِن وَيَحفَظنَ فُرُوجَهُن وَلاَ يُبدِينَ زِينَتَهُن إِلا مَا ظَهَرَ مِنهَا وَليَضرِبنَ بِخُمُرِهِن عَلَى جُيُوبِهِن وَلاَ يُبدِينَ زِينَتَهُن إلى قوله: وَلاَ يَضرِبنَ بِأَرجُلِهِن لِيُعلَمَ مَا يُخفِينَ مِن زِينَتِهِن وَتُوبُوا إِلَى اللهِ جَمِيعاً أَيهَا المُؤمِنُونَ لَعَلكُم تُفلِحُونَ (النور:30). قالت عائشة رضي الله عنها: { يرحم الله نساء المهاجرات الأُول؛ لما أنزل الله: وَليَضرِبنَ بِخُمُرِهِن عَلَى جُيُوبِهِن شققن مروطهن فاختمرن بها }( رواه البخاري).

قوله تعالى: يأَيهَا النبِي قُل لأزواجِكَ وَبَناَتِكَ وَنِسَاء المُؤمِنِينَ يُدنِينَ عَلَيهِن مِن جَلابِيبِهِن ذلِكَ أَدنَى أَن يُعرَفنَ فَلاَ يُؤذَينَ وَكَانَ اللهُ غَفُوراً رحِيماً )الأحزاب:59

قوله تعالى: وقَرنَ فِي بُيُوتِكُن وَلاَ تَبَرَّجنَ تَبَرجَ الجاَهِلِيةِ الأولَى )الأحزاب:33(.
ودى حاجة بسيطة من السنة

كاسيات بالاسم يقول صلى الله عليه وسلم : ( سيكون في آخر أمتي نساء كاسيات عاريات على رؤوسهن كأسنمة البخت العنوهن فإنهن ملعونات ) زاد في حديث آخر : ( لا يدخلن الجنة ولا يجدن ريحها وإن ريحها لتوجد من مسيرة كذا وكذا ) قال ابن عبد البر : ( أراد صلى الله عليه وسلم النساء اللواتي يلبسن من الثياب الشيء الخفيف الذي يصف ولا يستر فهن عاريات في الحقيقة ) .
وليا كلام مع اخوانا البنين بعدين سلااااااااااااااام