الخميس، 18 مارس، 2010

البلد بنت اللل...

السلام عليكم

غبت كتير ووحشتونى كتير بس كانت ظروف كتيرة من موت جدتى لزواج اخويا لاشغال واعطال بس الحمدلله فترة وعدت

نيجى بقا لموضوعنا لبلد بنت اللل

كل ما واحد فينا يتكلم يقلك البلد واللى فى البلد وابو البلد وتيت البلد وكلام كتير طيب انت عملت ايه للبلد ولا حاجة

الشعب بن التيت وشعب البتاع هو سيادتك مش من الشعب؟

الحكومة اللى عاملة ومسوية هيا الحكومة دى صينى ولا منتج محلى متربى على اللى اتربى عليه الشعب؟

لما بيبقا مجموعة محترمة بيكونى قائدهم اكثرهم احتراما ولو علمية تختار اكثرهم علما ولو عضلية اكثرهم قوة احنا بقا شعب ايه....؟ يبقا يمسكنا اكثرنا....

احنا مقضينها شعارات وشتيمة وزهق طيب قلى يا عم الزهقان عملت ايه غير الشتيمة والانتقاد وقلة الادب...

عربية الانابيب شايلة يجى 300 انبوبة وواقف 200فرد على الاكثر وبرده الناس بتتخانق وهيقطعوا بعض مع ان لو وقفوا كلو هياخد ليه...؟

اتنين سواقين نقل بيحطوا جاز والراجل قالهم موجود عشان واحد دخل قبل التانى قام طلع مطوة وموته ليه...؟

تلاقينا بنجرى ومستعجلين ونتخانق عالمواصلات عشان رايحين من مكان ما بنعملش فيه حاجة لمكان تانى برده مش هنعمل فيه حاجة...

وغيرهم كتير مش بقول ان الحياة زبادى ف خلاط بس الحياة بقت كدا والبلد حالها بقا كدا عشان احنا عملناها كدا

الولد طلع لقا بابا بيقوله رد عالتليفون وقله انا مش موجود والام تقول للاب اعمل زى زمايلك وارتشى وما تجهدش نفسك ف الشغل على قد فلوسهم اديهم ولما ترمى الزبالة تكسل تروح للصندوق فترميها فى اقرب مكان ولو حد خد حقك موته ولو ولو ولو...

تربية زى دى تخرج ايه غير كذب ومنافق ومرتشى وووو...

الواحد من دول يخلف عشرة وعاوزلهم اكل وشرب ووظايف طيب منين؟؟؟

سيبك من انه خلف كتير نيجى لشبابنا خيرة البلد واحلى مسا على عيونهم فى حلى اقهاوى وكافيهات البلد

الواد من دول اتخرج بقاله كام سنة ولسه بياخد المصروف وقاعد عالقهوة ونازل شتيمة ف الحكومة والبلد وهاتك يا لك وابوه عمال يلف عالمكاتب ويشوف سكة لرشوة عشان يعين الحيلة طيب يا حيلتها معاك لغات ايه؟ وبتعرف كمبيوتر ولا لأ؟ ومهاراتك ايه؟ وهكسب من وراك ايه؟ هنافس بيك على ايه؟ هتخرج منتج شكله ازاى؟ ثقافتك ايه؟ فاكر ايه من دراستك؟ تقديرك ايه؟

ولا حاجة يبقا انت كمان ولا حاجة ومش هتساوى حاجة انت عديم الفايدة عملت ايه تستهل عليه شغل او حياة عاوز تكون انسان محترم ازاى وانت ما احترمتش نفسك انت ما قدرتش نفسك فما حدش هيقدرك

نفسى كلنا نبطل كلام وكل واحد يعمل اللى عليه ويطور نفسه ويجتهد عشان يبقا حد كويس

الشركات كلها تخصصت ودا افيد بيمنع الكوسة انت كويس وهتدينى شغل هجرى وراك وانت وحش وما بتعرفش حاجة انا مش فاتحها سبيل

والموظف اللى تروح تكلمه يقلك استنى واتنيل واتحرق وهما دول اللى صعبانين علينا اول ناس بتطلع عنينا بنتشطر على بعض وهتافات وكلام فى الفاضى ما حدش بيحس بحد

ما تمشى مصالح الناس ما هما غلابة زيك انما ازاى لازم اطلعه عليهم وبعدين على قد الفلوس اللى باخدها والله يا سيدى يوم ما اشتغلت كنت عارف انك هتقبض كدا عشان الشغل دا مش عاجبك سيبه غيرك نفسه فيه...

احوال كتير غلط احنا السبب فيها عشان تتغير والبلد كلها تتغير لازم احنا نتغير بصراحة بدأنا حتى نفقد الامل فى التغير
ابقا اسمع واحد يقول البلد بنت تيت وانا العن تيت اهله ههههه

تحياتى

الجمعة، 11 ديسمبر، 2009

فرص

بسم الله
موضوع شغلنى من رمضان اللى فات وهو الفرص اللى بتيجى للواحد وبيضيعها ويرجع يندم تانى عليها،
بس مش هتكلم عموما انا هخصص شوية يعنى فى الاسلام وعلاقة العبد بربه...
هو ليه الفرد فينا ربنا بيديله اكتر من فرصة يقرب وهو مصمم يبعد؟
ليه الفرد فينا ربنا بييسرله انه يعوض اللى فاته او أخطأ فيه وهو مصمم يضيع قديم وجديد؟
هو ليه ربنا عمال يتودد لينا واحنا بنتباعد عنه؟
هو ليه ربنا خيره الينا نازل وشرنا اليه صاعد؟
بقول يمكن علشان الفرص كتير احنا بنضيعها علشان رحمة ربنا وسعت كل شئ فاحنا بنطمع؟
بس مين اللى هيطمع اللى مضيعها خالص ولا اللى ناقصه خطوة واتنين؟
بصوا معايا كده للفرص دى ومش عاوز اضمن ايات واحاديث كتير احنا بندردش
لما يكون عندك خمس فروض كل يوم صلاة مكتوبة ب17ركعة والمشرع سبحانه وتعالى يديك فى سنة نبيه17زيهم علشان الخطأ
والنسيان فلما تقصر فى الفرض يقتطعلك من السنة وتكمل اجر لفرض اللى هتتحاسب عليه رحمة بيك نغتنمها ولا نضيع فرض وسنة؟
لما يكون عندك زكاة مكتوبة وفرض عليك ويديك نافلتها صدقة نغتنمها ولا نضيع الاتنين؟
لما يكون عندك حج وعمرة ولو مش قادر صلى الفجر وفضل فى الجمع اذكر الله وقبل طلوع الشمس تصلى ركعتين يكتبولك حج وعمرة تامتين نغتنمها ولا نضيع؟
لما يكون عندك شهر رمضان واداك نوافل اتنين وخميس والايام القمرية لما تقصر فى دا دا بيعوض نضيع ولا نستثمر؟
لما يقلك من صام رمضان ايمانا واحتسابا غفر له ما تقدم من ذنبه دى فرصة تتضيع هتصوم شهر مؤمن بفرضيته ومحتسب ثوابه عند ربنا هيغفرلك ما تقدم من ذنبك
ولا علشان لاقيت من قام رمضان ايمانا واحتسابا غفر له ما تقدم من ذنبه فقلت نقوم بس وبلاش نصوم صح فقالك من قام ليلة لقدر ايمانا واحتسابا غفر له ما تقدم من ذنبه فاستثقلت كل القيام وقلت ليلة هتقضى ؟
ليه ما نستغلش الفرص دى مين قال انك هتلحق نافلة ولا تلحق رمضان الجاى ولا صوم عرفة الجاى ولا هتدرك ليلة القدر
شوف ربنا بيتقربلنا ازاى
عن ابى هريرة رضى الله عنه عن النبى صلى الله عليه وسلم قال"إن الله تعالى قال:من عادى لى وليا فقد آذنته بالحرب وما تقرب الى عبدى بشئ احب الى مما افترضته عليه ولا يزال عبدى يتقرب الى بالنوافل حتى احبه فاذا احببته كنت سمعه الذى يسمع به وبصره الذى يبصر به ويده التى يبطش بها ورجله التى يمشى بها ولئن سألنى لاعطينه ولئن استعاذنى لاعيذنه"
عن انس بن مالك رضى الله عنه عن رسول الله صلى الله عليه وسلم عن رب العزة قال"اذا تقرب العبد الى شبرا تقربت اليه ذراعا،واذا تقرب الى ذراعا تقربت منه باعا،واذا اتانى يمشى اتيته هرولة"
دى مكانة من احب واقترب واراد القرب من الله مش هجيب ايات ولا احاديث تانى بس تعالو نقيس نفسنا احنا بنقرب ولا بنبعد بنستغل الفرص ولا لأ؟ وليه؟علشان ربنا برحمته ادانا فرص كتير واحنا مش بنحب غير الفرصة الواحدة؟ ولا احنا رافضين القرب؟؟؟!

الاثنين، 9 نوفمبر، 2009

تاج المحبة

تاج وجاى من ام المدونين الفراغ وسمته تاج المحبة عشان تتعرف باولادها وكان لازم ارد اتفضلو معايا
انت مين بقى؟
انا اسمى احمد عبدالوهاب فؤاد ومشهور باحمد عفشة وعفشة دى لان عندنا ورشة عفشة عربيات ميكانيكا مش تنجيد ههههههه
عندك كام سنه؟
ماشى فى 21 بس انا اكبر من كدا ههههههههه
هل انت متزوج ؟ وهل عندك اولاد؟
لسه ما اتجوزتش وطبيعى ما فيش اولاد بس ان شاء الله هجيب بركات وملك هههههه
دراستك ايه؟
انا فى بكالوريوس حاسبات ومعلومات جامعة الزقازيق
كم طولك...وما لونك...
حوالى 180 وقمحى
هل تمارس عملا بشهادتك ام عمل حر وماهو
بشهادتى لسه انما بشتغل فى المستلزمات الطبية واوقات تجارة سيارات واى حاجة افهم فيها واكسب منها
ماهى مدة عملك اليوميه
مش نفس العدد كل يوم ايام ما بعملش حاجة وايام ارجع البيت عالفجر وايام ببقا فى البيت بس ورايا شغل كتير
ماذا تفعل بوقت فراغك
بعرف اللى فاتنى وانا مشغول واتكلم مع حبايبى واهلى
هل لديك هوايات....وهل تمارسها
متهيألى كنشاطات لأ بس بحب اقول خطب واتثقف دينيا اوقات بناقش صحابى واكلمهم انما قدام جمع بستحى وما عملتهاش كتير
هل تشعر برضا ربنا عنك ؟
سؤال صعب قوى ربنا رؤوف ورحيم وبيتودد للعبيد علشان يتوبو ويستغفروا وانا بحاول ابقا كده ونفسى انال رضا ربنا هو يمكن فيه علامات للرضا الحمد لله
هل تحب؟...ومن بقلبك الان؟
نعم احب وبقلبى من احب ههههههه
لو لم تجد من تحب ....فماذا ستفعل؟
الحمد لله وجدته
عندما تكون فى موقف اتخاذ القرار..تخالف الجماعه.. ام تشرك معك الاخرين ؟
مش بخالف الجماعة بس دايما بشوف الصح واعمله سواء فيه معارضة او لأ وبشركهم فى الامر اشوف اللى مش شايفه وبعدين اكرر
هل تتعامل بواقعيه؟
بحب امشى بخطوات محسوبة
ماهو الشيء الذى فعلته وندمت عليه طول عمرك ؟
مش فيه حاجة اندم عليها طول عمرى كده بس تقصير مثلا فى علاقتى مع ربنا او اهنت حد ظلمت حد دا كله بيسببلى ندم ومش بغفر لنفسى بسرعة بفضل الومها كتير مش بحتاج حد يقلى انت غلط
هل تصارح غيرك بالحقيقه ؟ ام ام تقول له مايريد سماعه؟
طبقا للموضوع نفسه مش بحب احرج حد بس لو حاجة هيترتب عليها قرار او مصلحة لازم الصراحة انما مجاملات اجامل
صف انسان يمكن ان تحبه عمرك كله
كده هوصف اللى بحبه ههههههه
متى يقسوقلبك ؟ومتى يقسو لسانك؟
يقسو قلبى اذا شعر بالجفاء والاستهتار بمشاعره او جرح ويقسو لسانى اذا عوملت بغير الادب او خوطبت بغير الائق
من هو اول من قلت له احبك؟
لمن احب
هل يمكن ان تحب احد من المدونين؟
ما عدش ينفع خلاص ارتبطت هههههههه
وهل يمكن ان يكون شريك حياتك؟
قلنا ما عدش ينفع بقا الله ههه
ماذا تعنى لك المرأة او الرجل؟
المرأة هى امى واختى وابنتى وحبيبتى ريحانة الانف وملاذ القلب والحنان
فى زمن البحث عن الماده ..عن ماذا تبحث انت ؟
ابحث عن السعادة وما يقتضى ان يديمها
متى تعرف انك تحب ؟
حين لا استطيع العيش بدون من احب واتلهف لرؤيته واتغير لبعده
ماهى الشخصيه التى اثرت بحياتك ؟
جدى رحمه الله
هل يوجد من تراه سعيدا فى الدنيا ولماذا ؟
كل من رضى بحاله ولم ينظر لغيره فهو سعيد
سياره وسائق ووقت متاح ....تذهب الى اين ؟ ولمن ؟ بالترتيب ام تفضل ان تكون وحيدا
لمن احب ثم ابى وامى ثم المقابر لزيارة جدى
ماهى درجة صراحتك ؟
صريح ولكن لا احب ان اجرح احد
وماهى المواقف التى يمكن ان تكذب فيها ؟
ما احله الشرع فى الصلح بين متخاصمين ولكنى اعتبر الكذب خيانة
هل يتغير الحب بعد الزواج؟
على ما اعتقد يجب ان يزداد فكل المسافات قد قصرت والحواجز انهدمت
فيما تفكر الان ؟
هعمل ايه فى الميعاد اللى ورايا هههههههه
لو لم تعيش بمدينتك؟؟؟فاى مدينه اخرى تفضلها
مش عايش فى مدينة اصلاهههه بس حابب البقاء مع اهلى وبعد ذلك حيثما وجد عملى
من اول من ياتى ببالك لتحكى له اسرارك؟
من احب
من تريد ان يكون دائما بجوارك ؟
من احب
من هو الد اعدائك؟
الظلم حيثما كان
ومن هو صديقك
ناصر المظلوم حيثما وجد
ماهى صفات شريك العمر؟
هوصف اللى بحبه برده هههه
لو الدنيا كلها زيك....لمن تقول هذه العباره ؟
جدى رحمه الله
ماذا تكره فى الدنيا ؟
الفراق
وماذا تحب
الاجتماع
كيف تواجه مايضايقك
بالامل وحلول سريعة
وماذا تفعل عند المفاجآت
ما اضمنش نفسى فى المفاجآت بس غالبا ما بحبهاش غير السعيد منها
لو معاك فلوس اكثر مما تتخيل...فماذا ستفعل بها
حاجات كتير اكتر مما تتخيلى امى ههههههه
هل الفقر يصنع حبا؟؟
مش فاهم السؤال قوى بس كل حاجة بالحب تتم
وماذا لو وجد الحب فى زمن الفقر المادى؟
هذا يعتمد على المحبين انفسهم
ماهى اقسى صدمه تعرضت لها حتى وقتنا هذاوماذا كان رد فعلك وهل تعلمت منها شيء
وفاة جدى رحمه الله ورد فعلى بتضايق لما افتكره بس ما كانش ينفع ان واحد قارى وفاهم يفعل فعل الجهلاء كما فعلت انا واكيد تعلمت وتذكرت انما الصبر عند الجزع الاول
هل انت على استعداد لتلقى صدمات اخرى؟؟
لا خايف من دا قوى اتكسرت شوية من اللى فاتت
هل تصدق كل ماتقرا عن الاخرين كيف ترد على من لاتصدقه
بالتأكيد لا فمعظم المتداول الان اكاذيب اما ان اجادل عغلى علم او اتحقق واجادله
اذا احببت انسان ما ...هل تصرح له بحبك ؟وماذا تفعل لو لم يتجاوب معك؟
ما خلاص بقا حبينا وعدينا الحتة دى ههههههه
هل تؤمن بالمثل القائل:انا احب فانا اعيش
الحياة فعلا بتتغير بالحب وبتتغير قوى كمان
ماهى القضايا التى تشغل بالك؟
حال اللى حواليا
هل تستطيع تحقيق كل احلامك
والله دى حاجة بتاعت ربنا بس اللى عليا هسعى واحاول
هل تمتلك طموحا...وماهو؟
اكيد انى ابقا احسن واحسن
كيف ستحقق طموحك...ام سيبقى حلما فقط!!!!!!!!!!
بخطوات ثابته وجد واجتهاد وتوفيق ربنا فوق كل حاجة
ماهى علاقتك بالدنيا ماهى علاقتك بالموت
علاقتى بالدنيا حياة وعايشها واستعدا للموت والموت هو اللقاء المنتظر
لو لك اختيار زمن تعيش به....فماهوذلك الزمن ؟ ولماذا ؟
الزمن دا يمكن نقدر نعمل حاجة تعدل اللى احنا فيه
هل يمكن ان ارا ك وانت غائب؟؟؟؟؟؟؟
ممكن لو تلاقت الارواح والافهام
ماذا ترى فى نفسك مميزا عن الاخرين؟
كل واحد فيه حاجة مميزة بس اللى يدور عليها ويبرزها بس ما بحبش اتنكلم عن مميزاتى الكتيييير ههههههه
من اذا اقترب منك ...هربت منه بعيدا؟
من اذا اقتربت منه جرحنى او آلمنى او ذكرنى بالم
من تقول له : قرب منى قرب ...ياقلبى يا متغرب
اختى لما تسافر
ماذا تريد ان تقوم به قبل ان تموت
اتوب بجد
مارايك فى اسئلتى؟؟؟
جميلة جدا يا امى بس غسلتينى ههههههههه
وبدون مجامله
هل نسيت سؤال كان هاما بالنسبة لك؟
لا كده تمام
هل استطعت تغطية شخصيتك مع ملاحظة انى ماليش فى الكوره..........هههههههههه
غطيتى وزيادة كمان
من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟
اى حد بيشرفنى هنا وحابب يجاوب يتفضل

السبت، 31 أكتوبر، 2009

محنة

الهى كيف ادعوك وأنا أنا!وكيف اقطع رجائى منك وانت انت سبحانك.الهى ان لم أسالك فتعطينى فمن ذا الذى أساله فيعطينى؛وان لم ادعك فتستجب لى فمن ذا الذى ادعوه فيستجيب لى؛وان لم أتضرع اليك فترحمنى فمن ذا الذى أتضرع اليه فيرحمنى.
الهى وكما فلقت البحر لموسى فنجيته من الغرق؛فصلى وسلم يارب على محمد وعلى آل محمد ونجنى مما انا فيه من كرب بفرج عاجل وغير آجل وبرحمتك يا ارحم الراحمين.

الجمعة، 18 سبتمبر، 2009

الداعى من فوق...

السلام عليكم
وحشتونى كتييييييير بس ظروف وعدت الحمدلله كل سنة وانتو بالف صحة وخير وسلامة
كلام كتير عاوز اتكلم فيه اقلكو كل سنة وانتو طيبيبن رمضان جه وخلص والعيد جه وايام الخير مضت مسرعة وجاي ايام خير
ياريت نلحقها
المفروض كنت تكلمت من بدرى عن ليلة القدر بس اقول ايه يا جماعة ربنا هيوفق لليلة القدر من قدر له ذلك واجتهد فى سبيلها
عيبنا ان الفرص لما بنلاقيها كتير مش بنقول نغتنمها ونستزيد من فضل الله لا بنكسل ونقول خلاص الحق الفرصة اللى بعدها حتى فى احرج الاوقات
يعنى جه رمضان بدل ما استعد من شهر رجب ولا شعبان دا انا اخد اول عشر ايام استعداد وبعدين اكسل وبعدين اقول هلحق العشر الاواخر
وبعدين اكسل هبدأ من اول خمسة وعشرين واكسل واجى ليلة سبعة وعشرين واقوم
مين قالك بقا انها الليلة ؟لو الليلة مين قالك انك مخلص ودعائك مقبول؟ يلا ربنا يتقبلنا جميعا
هتكلم عن موضوع التكاسل والفرص الضائعة دى المرة لجاية اصله غايظنى شوية بس انهاردة معايا حديث جميل قوى قوى
أخرج أحمد والترمذى عن النواس بن سمعان عن رسول الله صلى الله عليه وسلم قال:"ضرب الله مثلا صراطا مستقيما,وعلى جنبتى الصراط سوران,فيهما أبواب مفتحة,وعلى الابواب ستور مرخاة,وعلى باب الصراط داع يقول:يا أيها الناس ادخلوا الصراط جميعا ولا تعوجوا. وداع يدعو من فوق الصراط ,فإذا أراد الإنسان اأن يفتح شيئا من تلك الأبواب قال:ويحك لا تفتحه,فإنك إن تفتحه تلجه.فالصراط:الإسلام ,والسوران:حدود الله,والأبواب المفتحة:محارم الله,وذلك الداعى على رأس الصراط:كتاب الله,والداعى من فوق:واعظ لله تعالى فى قلب كل مسلم".
صدق رسوال الله صلى الله عليه وسلم الذى أوتى جوامع الكلم صلوات ربى وتسلمياته عليه
حديث رائع مش لاقى كلام اقوله عليه ولا افسره الحديث سهل وبسيط جدا بس انا هسأل شوية أسئلة
الصرط قدامنا وهو الاسلام مشينا فيه والتزمنا بيه؟
والداعى معنا هل قرناه او تدبرناه ؟ هل استمعنا اليه بخشوع لنعلم ماذا يريد منا؟
والداعى من فوق يملؤنا هل اهتممنا به يوما؟هل التفتنا اليه؟
ام دوما نضع اصابعنا فى آذاننا لا نسمع الا ما نريد وما تزينه لنا نفوسنا ودنيانا وهذا الشيطان الاعمى بداخلنا
كم مرة نادى عليك الداعى وابيت وعاندت وقلت الا المعصية انظر وارى ما خلف الستار؟
كم مرة تحديت ربك بالمعصية واتخذت سبيل المحارم وتركت من يدعوك الى الخير؟
متهيألى ان احنا فى ايام عظيمة وكلها خير وبركة ما ينفعش نخرج منها زى ما دخلناها ما ينفعش نفضل ما بنسمعش وما نحاولش نسمع خلوا الخير اللى جونا يخرج خلونا نسمع داعى الخير ووالصراط المستقيم
"اهدنا الصراط المستقيم","والذين اهتدو زادهم هدى"
اللهم اهدنا الصراط المسقيم وزدنا هداية يارب العالمين
فيه كلام كتير لسه بس مش هطول معظمنا عارف ايه المفروض يحصل وعارف ان باب التوبة مفتوح لمن ارادها بصدق يلا نروح لربنا يلا ندور على الصراط المستقيم يلا كلنا نسمع داعى الله ونترك داعى الشيطان يلا كلنا نبقا جنود للخير
اللهم ربنا لك الحمد بما خلقتنا ورزقتنا وهديتنا وانقذتنا وفرجت عنا ولك الحمد بالقرآن ولك الحمد بكل نعمة انعمت بها علينا فى قديم او حديث لك الحمد حتى ترضى ولك الحمد اذا رضيت ولك الحمد بعد الرضى,اللهم صل على نبينا محمد أزكى صلاة وأكملها,اللهم انا نستغفرك انك كنت غفارا,اللهم وكم سترت علينا ذنوبنا فى الدنيا فاغفرها لنا وسترها علينا فى الاخرة ,اللهم عاملنا بعفوك ولطفك ومغفرتك ورحمتك ,اللهم قنا شر انفسنا وشر الشيطان وشركه,اللهم إنا نعترف لك بذنوبنا فلسنا قويء فننتصر ولا برئاء فنعتذر ولكنا مقرون بما كان منا فاغفر لنا ياربنا ولا تردنا خائبين ولا محرومين يا ارحم الراحمين يا رب العالمين,ربنا اغفر لنا ولإخواننا الذين سبقونا بالايمان ولا تجعل فى قلوبنا غلا للذين آمنوا,اللهم انا نعوذ برضاك من سخطك وبمعافاتك من عقوبتك ونعوذ بك منك لانحصى ثناء عليك انت كما اثنيت على نفسك,وصلى اللهم على سيدنا محمد وعلى آله وصحبه وسلم تسليما كثيرا
كل عام انتم بخير ودمتم فى رعاية الله وحفظه وعنايته
تحياتى

الأربعاء، 5 أغسطس، 2009

حاجات تانية خالص

السلام عليكم
ايه الموضوع دا ما فيش موضوع راضى يكمل خالص هفضل اقول حاجات كده وخلاص اللى عنده فكرة يبعتها وله الاجر والثواب
شوية حاجات تانية بقا
الاول زعلان عشان ما بقتش بقعد فى البيت خالص الناس اللى هنا دى وحشتنى وليهم حق فيا برده
عاوز اتكلم مع عبده وحشنى قوى وما اتكلمتش معاه من زمان وحاسس انه مخنوق او متضايق اليومين دول وهعرف ليه دا حبيبى وما بيخبيش عنى حاجة اللى عرفته انه دفع عالصبح الف وربعماية جنيه انهاردة وهو ما بيحبش يطلع فلوس عالصبح كدا ههههههه
بس محضر تبع مكتب العمل باين ولازم يدفع يلا يا بودى ربنا يرزقك بزبون يعوضهملك ههههه ابويا دا عثل والله عثل
وطبعا مقصر فى حق ام فتحى جداااااااااااااا نزلت يوم الاحد اوديها لدكتور قلتلها ازل دمياط اخلص شغل وراجع رجعتلها واحدة ونص بليل بس ان شاء الله رايحين انهاردة(ام فتحى دى امى بس انا بحب اندها كده )
فتحى بقا اخويا الكبير مش عارف اعمله ايه اخفف عنه الضغط النفسى اللى هو فيه بسببها منها لله بس انا بدعى ربنا يخلصك منها على خيرومن غير ما نظلم حد
ونسمة ماسمعتلهاش من زمان مع انى كنت بسمعها كتير واتكلم معاها ومشاكلها وعلاقتها بخطيبها بس كانت عملت حركة ندالة فمطنشها من يومها والبت(بتزعل قوى من كلمة بت دى) عمالة تحايل فيا بس انا سايق فيها الصراحة خطيبها حبيبى وطنشته على حسها يلا بكرة اصالحهم
والبت هالة بقالها كتير ما اتضربتش يلا اتلككلها انهاردة هههههههه
ثانيا فى الفترة اللى فاتت عدى عليا يومين من اروع واجمل ايام حياتى بجد من الايام اللى مش ببتنسى
اولهم يوم الاربع 29/7 وكان يوم جامد جدا واتبسط فيه قوى
التانى بقا كان يوم السبت1/8 ودا تقريبا اليوم المسجل رقم واحد فى حياتى وعاوز اغير عيد ميلادى واخليه فى اليوم دا احساس ما حستوش قبل كدا سعادة ما تتوصفش فرحة وحب وحنان وامان واحتياج وضعف وقوة واهتمام كل حاجة حلوة حسيت بيها ربنا يخليه ليا
كان فيه سؤال سألته ام المدونين الفراغ بتقول ايه اصدق عشر حاجات فى حياتك دا ان شاء الله هجاوب عليه البوست الجاى
يلا بقا كفاية كدا عاوز الحق اقعد معاهم قبل ما اقوم اسافر
تحياتى

الاثنين، 20 يوليو، 2009

حاجات وخلاص

السلام عليكم
جاى ومش عارف هكتب ايه بس كنت عاوز اكتب اى حاجة
الفترة اللى فاتت عدت عليا حاجات كتير من اول الامتحانات كدا وانت جاى بقا حاجات حزينة شوية مؤلمة يمكن
وحاجات تقلق وحاجات تفرح وحاجات تطير من الفرحة
الاول عدى يوم 2/6ودى الذكرى الاولى لوفاة جدى ومش هدخل فى الموضوع دا كتير بيتعبنى شوية بس كفاية اقول انه كان احب اهلى واقربهم الى قلبى وانا اكثرهم شبها به فى شكله وطباعه وهو مثلى الاعلى فى الحياة عليه رحمة الله
التانى من بعد اول مادة فى الامتحانات دخلت امى المستشفى وفضلت هناك طيلة فترة الامتحانات والحمدلله خرجت وبنكمل رحلة العلاج بقا
التالت فى نفس الفترة تعب اعز حد على قلبى فكمن بين لهيبين والحمدلله بفضل الله تعافى هو الاخر وكان تانى يوم بعد الامتحانات من اصعب ايام حياتى واشدها الما بس الحمدلله
كفاية كده زعل وندخل على حاجة تفرح
الحمدلله النتيجة ظهرت ونجحت ججـ وزمايلى ربنا وفقهم الف مبروك ليا وليهم وربنا يوفقنا جميعا الى ما يحب ويرضى
واحلى يوم من ايام العمر واللى طرت فيه من السعادة كانت تانى يوم بعد النتيجة بجد يوم ما يتنسيش ورينا يخليه ليا
وحاجات تانية كتير بس كدا كفاية كنت عاوز اطمن عليكو وحشتونى
جمعنا الله دائما على الحب فيه والطاعة
تحياتى