عملوها فيا وجابواى تاج!!

بسم الله
التاج بتاعى يا جماعة بقا قضية رأى عام تشى باشا تعب نفسه وعسر فى الجمجمة علشان يثبتنى ويزنقنى وقسم الحق بقا وبتاع بس ماشى مش هتعدى مع انه وعدنى لو فطرت معاه هيسبنى هههههههههههههههه بس الحمد لله جت على قد تاج احسن من التانى ههههههههههه فاكر
واول ما التاج وصل احمد باشا عنتر علطول قال نزنق عفشة وكانهم مش عارفنى بس لازم فضايح على الملأ ههههههههههههه
وكل حد رد على التاج يبعته لكل اللى عنده طبعا مش بقلم تشى تثبيتة اهى هرد عليه وبصراحة ان شاء الله لكل من اهداهولى ومتشكر لكل من تذكرنى ومن لم يتذكرنى ونبدأ باسم الله


1-عيب فيك ومش نفسك تتخلص منه ع الاطلاق؟؟
من ناحية العيوب اقلك ايه الادب الجم وتواضع الاخلاق المتناهى والكرم الزايد هههههههههههههههههههههه
هما حاجتين بصراحة الاول :بحب الشغل قوى واحب المكسب جدا بضحى براحتى كتير لو فيه شغل وهيجى من وراه فلوس يا تشى هههههههه ويمكن دا سبب انى مش بقابلكوا فى اتفاقات المصيف واسكندرية وكده عندى الشغل ثم الشغل
التانى :التناكة فى الكلام واوقات بتترجم غرور بس دا غصب عنى لانى بتعامل مع تجار كبار فمتعود اتكلم دايما باللغة دى علشان ما يحسوش انى صغير فى السن بعوض فرق السن ده بانى برخم عليهم فى الكلام واحسسهم انى احسن واتقل وبفهم عنهم فبقت عادة
2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟
السؤال ده رخم ههههههههههههه الترتيب يا جماعة هيبقا ابجدى هههههههههههههه هنعدى من المطب وهتكلم بصراحة مش تثبيت والله
1-احمد ابراهيم(تشى):دماغ حلوة قوى وبحبها وحبيته لله وفى الله مش عارف ايه اللى شددنى ليك وبحبك بجد والله اعلم
2-احمد عنتر :الحيرة اللى فى الدنيا شفتها معاه بس والله يا جماعة قلبه طيب قوى وحبيته فى الله
3-احمد فهمى:يخربيت عسل اهلك حتة سكرة ياد يا فهمى وقلبه طيب قوى وبحبه فى الله لما بزعل بحب اكلمه هو او تشى
4-سمير (المنوفى دى الشهرة):واد عسل بيمشى بخطوات ثابتة وبيحسبها صح وبآمنه على اسرارى
5-صلاح طارق:ابن بلدى وحبيبى بقا من الاخر رفيق الطريق واد مسخرة لما بنمشى مع بعض بنقسم تقسيم حلو وخصوصا فى المواصلات وبحس انه اخويا بس الصغير
3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟
مش بحب اعمل عليها صداقات كتير ولو عملت مش بينفع احافظ عليها علشان الشغل مش بفضا كتير للنت ولو فضيت بحب اكلم صحابى اللى فوق بس مش بحب افتح كلام مع اى حد تانى

4- العشرة اللى فوق ... ابعت لكل واحد فيهم رسالة !

1-احمد ابراهيم:انا حاسس انك صح بس ما تسوقش فيها ولازم نقول لعقلنا فيه حدود ما تنفعش تخطيها ولازم نقرب من ربنا شوية

2-احمد عنتر:ركز قوى فى الفترة اللى جاية ومهما اتغيرت خليك زى ما انت قلبك طيب وبتحب الخير للناس

3-احمد فهمى:العواطف مش كل حاجة والتهور فى الحب مش حلو خد كل حاجة بتأنى سيبك من الرومانسية الزيادة وادى فرصة لعقلك وحساباتك فى حياتك علشان ترتاح

4-سمير:امامك منعطف خطير هدئ السرعة وامشى بخطواتك الثابتة

5:ابو صلاح:ما تبطلش ضحك
5- العشرة اللى فوق دول اكتب لكل واحد كتاب او اغنية بتعبر عنه فى رأيك
يابنى بقوا خمسة هههههههههههههه
1-احمدابراهيم:اى حاجة لمحمد منير
2-احمد عنتر:دواير مروان خورى
3-احمد فهمى:القلب الطيب ههههههههههه
4-سمير:اى حاجة فيها سفر
5-صلاح:الحياة حلوة
6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟
واحد صاحبى غلط فى حقى وموريه السواد لحد دلوقت ومش راضى احل عنه اى حاجة بتضايقه او تضره بعملها مهما تكلفنى لان غلطه كان كبير شوية
7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟
والله الرسالة دى هعملها بوست كامل كنت ناوى اكتبه قبل ما اشوف التاج ده بس هكتبه بعد العيد ان شاء الله وهتبقا عن شوية مناظر شوفتها امبارح فى صلاة القيام فى جامع عمرو بن العاص ورا الشيخ محمد جبريل منها ضايقنى ومنها عجبنى استنوا البوست
اتمنى اكون رديت ردود مقنعة وما زعلتش حد منى
وفيه ناس كتير لسه بحبها فى الله والله ولم انسها ولكنى لا احب ان اذكرهم ها هنا فالله سبحانه وتعالى يعلم مدى حبهم واحترامهم فى قلبى ومنهم اخوات فضليات فى عالم التدوين اعجبت بموضوعاتهم وافكارهم واخوان كثر فى عالم التدوين وخارجه ارجو على الله ان يجعل حبى فيهم خالصا لوجهه الكريم وان يديم عليا وعليهم الحب فيه
ومعلش لو طولت وبهدى التاج لاى حد بيتفضل مشكورا بزيارة مدونتى واعجبه التاج فليتفضل