بجد بيريح

هنأجل الرسالة كمان مرة علشان المود بس مش مظبط
وبرده موضوع مش اسلامى بس عن حاجة جوايا
اوقات كتير قوى ببقا عاوز ابكى علشان حاجات كتير راحة منى او خسرتها ليا سبب فى ضياعها او ما ليش
بس مشكلتى انى ما ينفعش ابكى على ارض الواقع قدام اى حد او دمعتى غالية قوى وعزيزة قدام الناس
مش عارف دا كبرياء ولا غرور ولا رجولة ولا ايه بالظبط
اوقات كتير نفسى ابكى بس بمسك الدمعة بالعافية خايف ابان ضعيف قدام حد او اضعف حد قدامى
حتى يوم وفاة جدى واللى كان اغلى شخص عندى فى الدنيا سافرت من الزقازيق كنت بمتحن وصلت بعد ما دفنوه بساعة او اتنين وما كانش حد عرفنى ان جدى مات اصلا
ما عملتش حاجة من اللى الكل كان متوقعها تحصل من احمد لما يعرف بوفاة جده ايوة دخلت فى غيبوبة وكلام اهبل بس لما فقت ولاقتنى واقف قدام اهلى واخواتى وما يصحش ان البشمهندس احمد يبكى او ينزل دمعته او الكبير(زى ما بيسمونى) يضعف قدامهم
كنت بنصح الكل واسكت اى حد يبكى وانا جوايا بتقطع وما ينفعش اكتم دموعهم وابكى انا وخصوصا قدام والدتى وخالتى وخواتى لان بعد جدى دا والدتى وخالتى ما بقالهمش حد غيرنا
فضلت امسك فى نفسى يوم ورا يوم لحد مرة طلعت شقة بعيد عنهم وقفلت وفضلت ابكى واقول آااااااااااه كانت مكتومة بجد ارتحت ساعتها بس حظى السئ اختى تشوفنى واقلب البيت مناحة تانى حتى الخلوة ما بقتش نافعة
ولو مع حد وتعبان قدامى او حزين ونفسى ابكى او احسسه انى معاك او حاسس بيك او اريح نفسى بمعنى اصح وانزل دمعتى بخاف وبقول لأ
حتى مع صحابى ببقا فى قمة جرحى او تعبى وببقا اكتر واحد بيهزر او يضحك مش عاوز حد يحس بيا
فضلت اكتم واكتم وحاجات كتير عمالة تعدى عليا واخسر حاجات اكتر وعمال قلبى تزيد جراحه ونفسى اتكتم وعاوز اقول الآاااااااااااه بس مش عارف او خايف لتضعفنى او تضعف اللى قدامى
وصل بيا الامر للهروب الكامل من ارض الواقع والبكاء فى احلامى بس المشكلة انها اترجمت لارض الواقع
ايوة كنت نايم وبحلم وفى الحلم ببكى وبقول الآه اللى عاوز اقولها لاقتنى صاحى بتنفض ودموعى على خدى يعنى هربت منه فى الواقع لاقيته فى الحلم
امنعه فى الحلم كمان و لا انشره على ارض الواقع
كنت تعبااااااااااااااااااان قوى ونفسى اقول الآااااااااااااااااااااااااااااااااااااااااااااه معلش لو اتعبت قلوبكم معايا