اجرى على الله فيما اقول...

عدنا والعود احمد ما اعرفش بقا فيه مشكلة معايا فى الكتابة كده ليه بيبقا الكلام جوايا بس بنسى اكتبه او مش بعرف اطلعه من جوايا
انهاردة هتكلم فى موضوع مش جديد هو عن المرأة وحقوقها فى الاسلام بس اصلى سمعت حديث غريب شوية
ومش لاقى نصه ولا سند ليه واجتهدت علشان الاقيه بس دون جدوى فمش عارف بقا هو حديث ولا لأ بس هقوله يمكن حد سمعه او يلاقيله سند عنده الوحيد اللى جاوبنى قالى انه فيه نص قريب من كده بس مش فاكره حتى
انا سمعته على القناة الاولى المصرية لاننا كنا قافلين التلفزيون من بعد وفاة جدى الله يرحمه <قولو آمين> ولسه مشغلينه فبدأنا من اول الاولى تانى هههههه من شيخ اسمه الشيخ محمد وهدان كان فى برنامج مش فاكر اسمه بس كان فى وقت العصر كده تقريبا قال ايه بقا
فى سياق كلامه "من اضحك انثى كان كمن بكى من خشية الله " بس ما قالش دا حديث ولا مين قاله ولا خلافه وعقب "ومن بكى من خشية الله حرم جسده على النار" تصحيح تعقيبه دا معايا
عن أبي هريرة رضي الله عنه قال، قال: رسول الله صلى الله عليه وسلم: "لا يلج النار رجل بكى من خشية الله تعالى حتى يعود اللبن في الضرع، ولا يجتمع غبار في سبيل الله ودخان جهنم"
المهم بقا اول واحد سألته على الحديث دا بيقلى سمعته من مين فحكيتله قالى "لا دول ما تاخدش منهم علم"
يادى المصيبة عالم فى الازهر او راجل دكتور ما اخدش منه علم بس انا اللى استاهل انى سالت واحد زيه
المهم انا دورت ومش لاقيه زى ما قلت لو حد فيكو عرف يلاقيه ياريت يبلغنى او حاجة بمعناه
بس انا شايف ان المتن مش راكب يعنى باللفظ دا مش اى انثى يعنى اضحكها يمكن ودا الاقرب يعنى للاداب المحمدية انها تبقا من ذوى رحمه او محارمه يعنى يرسم على وشها البسمة ويدخل على قلبها السرور يبقا زى اللى بكى من خشية الله ودا المعنى اللى حرص عليه الاسلام سواء فى القرآن او السنة او الاخلاق المحمدية لتوضيح مكانة المرأة فى الاسلام
كرمك ايتها الام والاخت والابنة والزوجة
و روى الترمذي عن عمرو بن الأحوص الجشمي رضي الله عنه أنه سمع النبي صلى الله عليه و سلم في حجة الوداع يقول, بعد أن حمد الله تعالى و أثنى عليه و ذكر و وعظ ثم قال:" ألا واستوصوا بالنساء خيرا فانما هن عوان عندكم, ليس تملكون فيهن شيئا غير ذلكالا أن يأتين بفاحشة مبينة, فان فعلن فاهجرهن في المضاجع و اضربهن ضربا غير مبرح, فان أطعنكم فلا تبغوا عليهن سبيلا, ألا ان لكم على نسائكم حقا, ولنسائكم عليكم حقا, فحقكم عليهن أن لا يوطئن فروشكم من تكرهون, ولا يأذن في بيوتكم لمن تكرهون,ألا و حقهن عليكم أن تحسنوا اليهن و كسوتهن و طعامهن"
عن جابر بن عبدالله الانصاري ، عن النبي صلى الله عليه وسلم أنه قال :
( مازال جبريل يوصيني بالنساء ، حتى ظننت أنه يحرم طلاقهن ...
وعنه ايضا صلى الله عليه وسلم :
(إنما النساء شقائق الرجال )
( إن من أكمل المؤمنين إيمانا أحسنهم خلقا وألطفهم بأهله )
(اتقوا الله فى النساء فإنكم أخذتموهن بأمان الله ، واستحللتم فروجهن بكلمة الله ) .
( رفقا ... رفقا بالقوارير ) .
عن أنس بن مالك قال : قال رسول الله – صلى الله عليه وسلم -: "من عال جارتين حتى تبلغا جاء يوم القيامة أنا وهو كهاتين وضم أصابعه"أخرجه مسلم .
وغيرها الكثير والكثير من الاحاديث والايات التى بينت مكانتك اختى فى الاسلام وعلو منزلتك ولكن لاتؤاخذى من فهم الدين فهما غير صحيح واستخدم اسم الدين فى ذلك ولكنها فى الاساس يستخدم تعصبا جاهليا اعمى
وفيه تصحيح صغير لرواية عن بن مسعود كنت ذكرتها فى موضوع" حينما يهان اوتهان " بتاريخ 28/8
يقول بن مسعود ثلاث فى القرآن مقرونة بثلاث"اى ثلاثة امور لا تصلح الا بثلاث متلازمات"1-"وقضى ربك ألا تعبدوا إلا إياه وبالوالدين إحساناً" [الإسراء: 23].2-"وأقيموا الصلاة وآتوا الزكاة" 3-"أطيعوا الله وأطيعوا الرسول"الشاهد منها "وقضى ربك ألا تعبدوا إلا إياه وبالوالدين إحساناً "فمن عبد الله وعق والديه لم يتقبل منه ومن عق والديه
والتصحيح فى الشاهد او رقم واحد والصح انها الاية اللى بتقول
قول الله تعالى:﴿أَنْ اشْكُرْ لِي وَلِوَالِدَيْكَ﴾ فمن شكر الله ولم يشكر لوالديه لم يقبل منه.
عذرا على الاطالة كان فيه لسه كلام كتير بس فى مرة تانية ان شاء الله قريبا

ياترى انا صح؟؟

بسم الله
حتى التدوين ما بقاش فيه نفس ليه
بس عاوز اعرف انا صح ولا غلط
كتير ببقا مهموم وجوايا حزن كتير بس مش ببقا عاوز احكيه ولا اتعب حد معايا حتى لو كان اقرب حد ليا مش عاوز اتعبه معايا
شايف انى اقدر اتحمل همومى وهموم غيرى بس ما حدش يقدر يتحمل همومى معاه او ما بحبش اتعب حد معايا زى ما قلت
ممكن دا يكون غلط او يخلي القريبين منى يحسو انى بعمل فرق بس انا مش ببقا قاصد كده انا ببقا فى عز تعبى وكبتى بدور على راحة اللى حواليا ومش عاوز احملهم حاجة
بس دا بجد شئ متعب قوى ومش بالساهل لانك ما بتعرفهمش وهما بيبقوا عاوزينك تتعامل عادى لانك ما بتقلش اللى جواك ازاى هيفهمو او يريحوك من غير ما يعرفو معادلة صعبة جدا بتبقا وصلت لمرحلة "دونت تاتش " بس مش قادر تغير التعامل معاهم لانك مش هتحكى ولو غيرت هما كمان هيزعلو لانهم ما يعرفوش ايه جواك مخليك مهموم
دى حاجة والحاجة التانية
دايما بربط اى هم او غم يجيلى بذنب انا عملته يعنى اول ما الاقى شوية هم او غم او مشاكل اقول يبقا انا عملت ذنب معين ودا عقاب وافضل افكر ايه هو الذنب بس بتعب قوى فى التفكير
ما يمكن يكون اختبار مش لازم ذنب يعنى بس هو انا كده ما اعرفش انا صح ولا غلط
بتوصل معايا انى ربطت قعدة بنت جمبى فى المواصلات بذنب "مش متخلف ولا معقد ولا رجعى"
يعنى لو انا ركبت واللى هيجى جمبى جت بنت افضل افكر واقول انا عملت ذنب علشان كده جت بنت مش ولد
حاجات كتير بربطها بالذنوب مع انها ممكن تبقا عادى او اختبارات بس مش عارف انا بعمل كده ليه؟
وكتم همومى جوايا بقا بجد بيخنق بس مش عاوز اتعب حد معايا اعمل ايه بقا؟
ارجو على الله ان يؤجرنى فى ما يصيبنى من هم او حزن مصداقا لقول رسوله صلى الله عليه وسلم
(مَا يُصِيبُ الْمُسْلِمَ مِنْ نَصَبٍ وَلاَ وَصَبٍ وَلاَ هَمٍّ وَلاَ حُزْنٍ وَلاَ أَذًى وَلاَ غَمٍّ حَتَّى الشَّوْكَةِ يُشَاكُهَا، إِلاَّ كَفَّرَ اللَّهُ بِهَا مِنْ خَطَايَاهُ)
واختم بما أمر به النبى صلى الله عليه وسلم فى حديث بن مسعود
عن عبد الله بن مسعود -رضي الله عنه- أن النبي -صلى الله عليه وسلم- قال: (مَا قَالَ عَبْدٌ قَطُّ إِذَا أَصَابَهُ هَمٌّ وَحَزَنٌ: اللَّهُمَّ إِنِّي عَبْدُكَ وَابْنُ عَبْدِكَ وَابْنُ أَمَتِكَ نَاصِيَتِي بِيَدِكَ مَاضٍ فِيَّ حُكْمُكَ عَدْلٌ فِيَّ قَضَاؤُكَ أَسْأَلُكَ بِكُلِّ اسْمٍ هُوَ لَكَ سَمَّيْتَ بِهِ نَفْسَكَ أَوْ أَنْزَلْتَهُ فِي كِتَابِكَ أَوْ عَلَّمْتَهُ أَحَداً مِنْ خَلْقِكَ أَوِ اسْتَأْثَرْتَ بِهِ فِي عِلْمِ الْغَيْبِ عِنْدَكَ أَنْ تَجْعَلَ الْقُرْآنَ رَبِيعَ قَلْبِي وَنُورَ صَدْرِي وَجَلاَءَ حُزْنِي وَذَهَابَ هَمِّي. إِلاَّ أَذْهَبَ اللَّهُ عَزَّ وَجَلَّ هَمَّهُ وَأَبْدَلَهُ مَكَانَ حُزْنِهِ فَرَحاً. قَالُوا: يَا رَسُولَ اللَّهِ يَنْبَغِي لَنَا أَنْ نَتَعَلَّمَ هَؤُلاَءِ الْكَلِمَاتِ؟ قَالَ: أَجَلْ يَنْبَغِي لِمَنْ سَمِعَهُنَّ أَنْ يَتَعَلَّمَهُنَّ) رواه أحمد وابن حبان، وصححه الألباني.
معلش لو خنقت عليكو
تحياتى