السلام عليكم
جاى ومش عارف هكتب ايه بس كنت عاوز اكتب اى حاجة
الفترة اللى فاتت عدت عليا حاجات كتير من اول الامتحانات كدا وانت جاى بقا حاجات حزينة شوية مؤلمة يمكن
وحاجات تقلق وحاجات تفرح وحاجات تطير من الفرحة
الاول عدى يوم 2/6ودى الذكرى الاولى لوفاة جدى ومش هدخل فى الموضوع دا كتير بيتعبنى شوية بس كفاية اقول انه كان احب اهلى واقربهم الى قلبى وانا اكثرهم شبها به فى شكله وطباعه وهو مثلى الاعلى فى الحياة عليه رحمة الله
التانى من بعد اول مادة فى الامتحانات دخلت امى المستشفى وفضلت هناك طيلة فترة الامتحانات والحمدلله خرجت وبنكمل رحلة العلاج بقا
التالت فى نفس الفترة تعب اعز حد على قلبى فكمن بين لهيبين والحمدلله بفضل الله تعافى هو الاخر وكان تانى يوم بعد الامتحانات من اصعب ايام حياتى واشدها الما بس الحمدلله
كفاية كده زعل وندخل على حاجة تفرح
الحمدلله النتيجة ظهرت ونجحت ججـ وزمايلى ربنا وفقهم الف مبروك ليا وليهم وربنا يوفقنا جميعا الى ما يحب ويرضى
واحلى يوم من ايام العمر واللى طرت فيه من السعادة كانت تانى يوم بعد النتيجة بجد يوم ما يتنسيش ورينا يخليه ليا
وحاجات تانية كتير بس كدا كفاية كنت عاوز اطمن عليكو وحشتونى
جمعنا الله دائما على الحب فيه والطاعة
تحياتى
الاشتراك في:
تعليقات الرسالة (Atom)
هناك 12 تعليقًا:
ماشي يا حاج عفشه
اند ويلكم باك
انا قلت انك اعتزلت التدوين
وطلعت معاش مبكر
لا يا بو صلاح قاعد على قلبك هههههههههه
نورت با حبيبى
تحياتى
هي دي الايام بتلعب بينا
واحنا بنلعب معاها
ربنا يكتر اي ام فرحك ويرضيك في ايام حزنك يا رب
والف سلامة على ماما ..ربنا يتم عليها عافيتها يا رب
.
.
.
وخليك فاكر انك نسيت اهم حدث في تلك الفترة
يوم ما قلبتني واكلت عليا الغدوة:((
مش واخد لي بالك انت انه هيبقى العيد القومي لكليتكوا اصلا:-P
ربنا يكرمك
والحياه كده شويه كده وشويه كده وربنا بيشوف هنعمل ايه هنا وايه هنا
ربنا يباركلك ويعزك يارب
وبلاش تعتزل تانى
ربنا يكرمك يارب
حماده باشا
حمدا لله علي سلامتك
ورحم الله جدك وشفي والدتك شفاء لا يغادر سقما ..ووفقك يااااارب
تقريبا نفس اللي حصل لي في امتحانات تالته اعدادي
دمت بكل خير
بوبا
ايه الشرف العظيم دا
ربنا يكرمك على دعواتك الجميلة دى
وما نستش ولا حاجة هيا دى حاجة تتنسى
ووالله مش اكلت الغدوة بس كان فيه زعابيب مع الحاج عبده والشغل كان متعطل وعربية بتتباع وليلة اتخانقت معاه عشرين مرة على ما وصلتله ههههههه
معلش بقا تتعوض
وبعدين احنا اعلناه العيد القومى خلاص
نورتى وتحياتى
جيجى
نورتى المدونة وربنا يكرمك ويباركلك يارب على مجهوداتك المتواصلة دائما وان شاء الله ما فيش اعتزال ولا حاجة
شرفتينى
تحياتى
خالد فوده
حبيبى ووحشنى يابنى طمنى عليك دايما معلش لو مقصر
وشكرا لدعواتك الجميلة ربنا يوفقك دائما الى ما يحب ويرضى
تحياتى
ردي جاي متأخر يمكن علشان يكون ختامه مسك ولا حاجة ههههههههههههه أزيك يا عفشة محدش بيشوفك وأنت ندل أصلا ومش بتسأل ومقولتليش عن الأحداث إلي حصلت معاك دي أيا كان حمد لله علي سلامة الحاجة وربنا يشفيها يا رب أما عن الحزن فالحزن أكيد في القلب ومحدش بينسي حد بس زي ما قولتلك قبل كدة حاول تتجاوز الحزن دة زي ما حصل معايا وأنا عارف إنك قدها وقدود وأكتر مني كمان أنت مش شايف فرق الجسم ههههههههههههههه
وصل سلامي للحاج والحاجة وأخواتك
أحمد عنتر
حورس
حورس
الحمدلله ياعنتر تمام وانت اخبارك ايه؟
بس مشغول شوية معلش
والحمدلله فترة وعدت والحاجة بقت تمام
والسلام وصل خلاص
تحياتى
اهلا بعودتك يا احمد
منور المدونه
وربنا يرحم حبيبك والحمد لله انك شكله
يعنى هاتعيش دايما معاه
ومش مهم انك كاتب ايه
المهم انك عدت تنورنا ونسئل على بعض
واشكرك على سؤالك عنى اكتر من مره
حقيقى فعلا من القلب للقلب
ربنا يخلى ماما وماتتحرمش منها ابدا ويارب تشيل ولاد ولادك
ويشفيها شفاء لا يغادر شقما
بجد منور فى وسط المدونات يا حماده
والف الف مبروك النجاح وتمنياتى بالتوفيق الدائم
يا الف اهلا بعودتك انتى امى نورتى المدونة والله
اهم حاجة انى كتبت وحضرتك نورتينى مش هبطل كتابة تانى
واكتر من مرة ايه انا كنت مقصر وعاوز اطمن على حضرتك كل دقيقة
وربنا يبارك فى حضرتك وفى اولادك دائما وابدا يارب العالمين دمتى بكل الخير
إرسال تعليق